Цæгат Ирыстоны райдыдта Уациллайы бæрæгбон

Сыгъдæгзæрдæйæ Хуыцаумæ скувын æмæ Уациллайыл хи бафæдзæхсын. Фыдæлты æгъдау æххæст кæнынц Ламардойнæгтæ дæр. Уацилламæ кувæн къуыри ам у тынг кадджын. Фыдæй фыртмæ æгъдау хæццæ кæнынц. Уациллайыл сæхи фæдзæхстой ирон адæмы рагфыдæлтæ дæр. Цæгат Кавказы хæхты дæлвæзты куы æрцардысты, уæд райдыдтой зæххы куыст кæнын. Афтæмæй табу кодтой Уациллайæн, уымæн æмæ у хоры, ихы, къæвдайы, арвнæрды бардуаг. Кусарты фыдæзгъæл, бæгæны æмæ æртæ чъириимæ ирон æгъдаумæ гæсгæ адæм æрбацыдысты кувæн бынæттæм. Алы аз дæр Дзуары бын, лæгæты ныууадзынц бæгæны - уый у бæрæгбоны æгъдæуттæй иу. Уыдис иу афтæ, æмæ-иу раздæр Дзуары лæг æхсæвы кувæндоны баззад. Уæд дам Уацилла йæ кувæн бынатмæ æрцæуы æмæ къусы цы бæгæны вæййы, уымæй акалы. Афтæмæй стæй фæбæрæг кæнынц цавæр аз уыдзæн, уый. Сыгъдæг зæрдæйы уаг æмæ хъуыдытимæ абон æгас Ирыстон, уыимæ æндæр рæттæй бинонгай цыдысты сæ кувинæгтимæ сæхи бафæдзæхсынмæ. Лæгæтмæ ссæуынц æрмæст нæлгоймæгтæ - Дзуары лæгтæ, уырдæм сылгоймæгтæн цæуæн нæй. Уацилла у карз æмæ æгъатыр дзуар. Бæрæгбоны бирæ уыд фæсивæд дæр. Ныры дуджы уый ахсджиаг у - фыдæлтыккон царды бындур фидæнмæ дæттын.