Цæгат Ирыстоны райдыта анимацион мультипликацитæ аразыны ахуырадон интенсив

Операция-Æнимация" ахуырадон интенсивы фыццаг къæпхæн райдыдта Дзæуджыхъæуы. Архайджытæ - 40 æрыгон ахуыргæнæджы æмæ профилон здæхтытæм гæсгæ студенттæ Цæгат Ирыстон æмæ Цæцæны республикæйæ. Цалдæр боны зонгæ кæндзысты аннимацион мультипликацитæ аразыны сусæгдзинæдтимæ. Дарддæр сæ зонындзинæдтæ парахат кæндзысты скъолаты æмæ сывæллæтты рæвдауæндæтты. Сабитимæ иумæ араздзысты мультфильмтæ. Уыимæ, мадæлон æвзагыл. Форумы эксперттæ сты Уæрæсейаг æхсæнад "Знание"-йы лектортæ, педагогтæ, фæлтæрдджын аниматортæ, къамисджытæ æмæ Новосибирскæй специалисттæ. Уыдон араздзысты алыхуызон дæсныйадæвдисæг ахуыртæ, тренингтæ æмæ хъæзтытæ. Уæ зæрдыл уын æрлæууын кæндзыстæм, æрыгон ахуыргæнæг Хабæты Альбинæйы проект "Операция-Æнимация" рамбылдта Уæрæсейы фæсивæды грантон конкурс. Специалист сывæллæттимæ иумæ аразы мультипликацитæ ирон æвзагыл. Йæ сæйрагдæр нысаныл нымайы кæстæртæм мадæлон æвзагмæ уарзондзинад рæзын кæнын.