Беслæны равдыстой спектакль "Бременаг музыканттæ"

Ацы зарæг Алиса Ждановайы зæрдæйы уæлдай бынат ахсы. Фыццаг хатт æй скъолайы ауайæнты фехъуыста, музыкæйы зæлтæйæ сæ фæстæ асайдтой æмæ чызг æнæнхъæлæджы кастингмæ бахауд. Равзардзысты йæ æмæ ма йын суанг сæйраг роль ратдзысты, ууыл чызг хъуыды дæр нæ кодта. Диссаг æм куыд нæ фæкаст режиссер ын йæ ном куы загъта уæд. Фæстæдæр райдыдтой бæстон репитицитæ, базыдтой театры сусæгдзинæдтæ. Ныр æнæ сценæ Алисæ йæ цард уынгæ дæр нæ кæны. 2004-æм азы трагедийы фæстæ Беслæны скъолайы райдыдтой спектакльтæ æвæрын. Куыста арт-терапийæ кæй хонынц, уый. Уæд уый бирæтæм æнæран каст. Фæлæ алы горæттæй сфæлдыстадон къордтæ дарддæр цыдысты сæ æрмæджытимæ. Æмæ рæстæджы фæстæ театр сывæллæттыл хорзы 'рдæм ахадын райдыдта. Сценæмæ иу рацыдысты сæ ныййарджытимæ. Спектакльтæ та иууылдæр сæхæдæг æвæрдтой. Хорз традици æххæст кæнынц абон дæр. Ивгъуыд аз скъола сси ныййарджыты æмæхсæнадты хъæппæристы конкурс «Знание»-йы уæлахиздзау. Проекты райрæзтæн сын радих кодтой милуан сомы. Самал кодтой ифтонггæрзтæ, актон залмæ рухсдæттæн системæ, уыимæ ма костюмтæ æмæ декорацитæ. Фæсивæд сæхи рагæй цæттæ кодтой. Ноябры кæрон скодтой кастинг æмæ уайтагъд репетицитæ райдыдтой. Режиссер — ГИТИС-ы студент, театр «Саби»-йы актер Гагулаты Сослан. Æмæ ныр сценæйыл сæ иумæйаг бæстон куысты хатдзæг — «Бременаг музыканттæ». Спектакль се 'ппæты зæрдæмæ дæр фæцыд. Æвдисын фæнд ма йæ кæнынц къуыри. Иннæ скъолаты ахуырдзаутæ рад самадтой йæ бабæрæг кæныны фæдыл. Чысыл актерты куыст фенын бирæты фæнды. Куырдиатджын сывæллæттæ зæрдæ æвæрынц, ацы театралон скъуыддзаг кæд фыццаг у, уæддæр фæстаг кæй нæ уыдзæн, уымæй.