Халăхсен туслăхĕ - тĕпре

Кăçал Раççейри халăхсен культура эткерлĕхĕн çулталăкĕ. Пирĕн çĕршывра 200 ытла тĕрлĕ халăх пурăнать. Вĕсен хăйне евĕрлĕхне, пуянлăхне тишкерес, упрас тĕллевпе тĕрлĕ ĕç-пуç иртет. Раççейри халăхсен çурчĕн директорĕ Андрей Березин çак кунсенче Чăваш Енре пулчĕ. Республикăри халăхсен ассамблейин ертӳçипе Леонид Черкесовпа, Республикăри «Трактор тăвакансен культура керменĕ» халăх пултарулăх центрĕн директорĕпе Наталья Фошинăпа малашне тачă çыхăнса ĕçлесси çинчен килĕшӳ çирĕплетрĕç.